امریکن فلم انسٹیٹیوٹ (AFI) نے اعلان کیا ہے کہ ہالی ووڈ کے معروف اداکار اور کامیڈین ایڈی مرفی کو 2026 میں لائف اچیومنٹ ایوارڈ سے نوازا جائے گا۔ یہ ایوارڈ 18 اپریل کو منعقد ہونے والی خصوصی تقریب میں پیش کیا جائے گا، جس میں فلم انڈسٹری سے وابستہ نمایاں شخصیات شرکت کریں گی۔
ایڈی مرفی نے اپنے کیریئر کا آغاز اسٹینڈ اپ کامیڈی سے کیا اور سیٹرڈے نائٹ لائیو کے ذریعے شہرت حاصل کی۔ بعد ازاں انہوں نے بیورلی ہلز کاپ، کمنگ ٹو امریکہ، دی نٹی پروفیسر اور شریک جیسی سپر ہٹ فلموں میں کردار نبھاتے ہوئے عالمی سطح پر پہچان بنائی۔ انہیں ڈریم گرلز میں ادکاری پر آسکر نامزدگی بھی ملی۔
AFI کے مطابق یہ ایوارڈ مرفی کی طویل فنی خدمات، مزاح نگاری اور ان کرداروں کے اعتراف میں دیا جا رہا ہے جنہوں نے کئی نسلوں کو متاثر کیا۔ ایوارڈ شو سے حاصل ہونے والی رقم انسٹیٹیوٹ کے تعلیمی اور تخلیقی پروگراموں پر خرچ کی جائے گی۔
