کراچی: پاکستان کے تجربہ کار کھلاڑی محمد آصف اور اسجد اقبال نے شاندار کارکردگی کا مظاہرہ کرتے ہوئے بھارت کے پنکج ادوانی اور بریجیش دمانی کو 1-3 سے ہرا کر ٹیم سنوکر ورلڈ کپ کے فائنل میں رسائی حاصل کر لی۔ یہ مقابلہ مسقط میں واقع ایکٹیو عمان اسپورٹس اینڈ انٹرٹینمنٹ ہب میں کھیلا گیا۔
میچ کا آغاز پاکستان کے لیے مشکل ثابت ہوا، جب پہلے فریم میں ادوانی نے اسجد کو 21-85 سے شکست دے کر بھارت کو 0-1 کی برتری دلا دی۔ تاہم، عالمی IBSF چیمپئن محمد آصف نے دوسرے فریم میں شاندار کم بیک کیا اور 23-120 سے جیت حاصل کی، جس میں ان کا 77 پوائنٹ کا عمدہ بریک شامل تھا۔ یوں مقابلہ 1-1 سے برابر ہوگیا۔
برابری کے بعد ڈبلز فریم کھیلا گیا، جس میں پاکستانی جوڑی نے بھرپور کھیل پیش کرتے ہوئے 47-75 سے کامیابی حاصل کی اور مجموعی برتری پر قبضہ جما لیا۔
اگلے فریم میں آصف نے اپنا جاندار تسلسل برقرار رکھا اور ادوانی کو 9-73 سے باآسانی شکست دے کر پاکستان کے لیے ناقابلِ شکست 1-3 کی برتری یقینی بنا دی۔ اسی وجہ سے آخری فریم، جو اسجد اور دمانی کے درمیان ہونا تھا، منسوخ کر دیا گیا۔
اس سے پہلے، پاکستان نے کوارٹر فائنل میں قطر کو یکطرفہ مقابلے میں 0-3 سے ہرا کر سیمی فائنل میں جگہ بنائی تھی۔
پہلے فریم میں اسجد نے 92 پوائنٹس کا شاندار بریک لگاتے ہوئے علی الوبیدلی کو 43-92 سے ہرایا۔
دوسرے فریم میں آصف نے احمد سیف کو 0-83 سے شکست دی، جس میں ان کا 62 پوائنٹس کا بریک نمایاں رہا۔
بعد ازاں ڈبلز فریم میں بھی پاکستانی کھلاڑیوں نے 26-79 سے کامیابی حاصل کر کے میچ کو 0-3 سے اپنے نام کر لیا۔
واضح رہے کہ فائنل میں پاکستان کا مقابلہ ہانگ کانگ چائنا 2 سے ہوگا۔
