کراچی: پشاور زلمی نے پاکستان سپر لیگ (پی ایس ایل) کے ساتھ اپنے فرنچائز معاہدے میں توسیع پر رضامندی ظاہر کر دی ہے، جبکہ دیگر فرنچائزز کو منگل تک فیصلہ کرنا ہوگا۔ دوسری جانب ملتان سلطانز کے معاملات بدستور حل طلب ہیں۔
تفصیلات کے مطابق پاکستان کرکٹ بورڈ (پی سی بی) نے حال ہی میں پی ایس ایل اور اس کی فرنچائزز کی ویلیوایشن مکمل کی، جس کی بنیاد پر نئی فرنچائز فیس مقرر کی گئی۔ پہلے فرنچائزز کو 20 نومبر کی ڈیڈ لائن دی گئی تھی، جسے بڑھا کر 25 نومبر کر دیا گیا۔
ذرائع کا کہنا ہے کہ گزشتہ چند روز سے فرنچائز مالکان کے درمیان مشاورت جاری تھی، اور پشاور زلمی نئی شرائط ماننے والی پہلی ٹیم بن گئی ہے، جبکہ دیگر فرنچائزز بھی جلد فیصلہ متوقع ہے۔
ادھر ملتان سلطانز کو پی سی بی کی جانب سے نئے معاہدے سے متعلق کوئی باضابطہ خط موصول نہیں ہوا۔ لیگ اور اس کے عہدیداروں پر مسلسل تنقید کے بعد ٹیم کے مالک علی ترین کو شوکاز نوٹس جاری کیا گیا جسے انہوں نے طنزیہ انداز میں ویڈیو میں پھاڑ دیا، جس سے معاملہ مزید پیچیدہ ہوگیا۔
فی الحال ملتان سلطانز کا کیس التوا کا شکار ہے۔ اگر منگل تک پیش رفت نہ ہوئی تو پی سی بی نئی بولی کا عمل شروع کرنے کا اختیار رکھتا ہے، اور علی ترین ڈسپلنری بنیادوں پر اس عمل میں شامل نہیں ہو سکیں گے۔ علی ترین نے حالیہ بیانات میں قانونی کارروائی کا بھی عندیہ دیا ہے۔
دو نئی ٹیموں کی تیاری شروع
ساتویں اور آٹھویں پی ایس ایل ٹیموں کی فروخت کی تیاریاں بھی جاری ہیں۔ چند روز قبل اشتہار جاری کیا گیا تھا جس کے بعد متعدد کمپنیوں نے دلچسپی ظاہر کی ہے۔
پی سی بی نے چھ شہروں کی فہرست جاری کی ہے، اور کامیاب بولی دینے والے خریدار ان میں سے اپنی ٹیم کا نام منتخب کر سکیں گے۔
شارٹ لسٹڈ شہر:
فیصل آباد، راولپنڈی، حیدرآباد، سیالکوٹ، مظفرآباد اور گلگت۔
نئی فرنچائزز کی نیلامی کی تاریخ کا اعلان
پاکستان سپر لیگ کے مطابق دو نئی ٹیموں کی نیلامی 6 جنوری 2026 کو ہوگی۔
یہ پی ایس ایل کی توسیع کے سفر میں اہم سنگ میل ہے، جس سے لیگ کی کمرشل ویلیو، کھیل کے مواقع اور فین انگیجمنٹ مزید بڑھنے کی توقع ہے۔
پی ایس ایل، جو اب دنیا کی ممتاز ٹی20 لیگز میں شامل ہے، مسلسل ترقی کی جانب گامزن ہے، اور پی سی بی کو نئے اسٹیک ہولڈرز کے شامل ہونے کا انتظار ہے تاکہ پاکستان کرکٹ کو مزید فائدہ پہنچایا جا سکے۔
