پاکستان تحریکِ انصاف (پی ٹی آئی) نے افغان اور بھارتی میڈیا میں عمران خان کی صحت کے بارے میں گردش کرنے والی خبروں کو “گھناؤنی اور بے بنیاد افواہیں” قرار دیتے ہوئے سخت ردِعمل دیا ہے۔
اپنے بیان میں پارٹی نے حکومت اور وزارتِ داخلہ سے مطالبہ کیا کہ وہ ان افواہوں کی فوری تردید کریں اور عمران خان کے اہلِ خانہ کو جلد از جلد ملاقات کی اجازت دی جائے تاکہ اصل حقائق سامنے آسکیں۔
پی ٹی آئی کے ترجمان شیخ وقاص اکرم نے حکومت سے مطالبہ کیا کہ عمران خان کی صحت اور سلامتی پر شفاف اور دوٹوک سرکاری بیان جاری کیا جائے۔ انہوں نے کہا کہ افواہیں پھیلانے والوں کی تحقیقات کی جائیں اور قوم کو حقائق سے آگاہ کیا جائے، کیونکہ قوم اپنے قائد سے متعلق کسی ابہام کو برداشت نہیں کرے گی۔
ان کا کہنا تھا کہ عمران خان کی سلامتی اور بنیادی حقوق کا تحفظ حکومت کی ذمہ داری ہے، اور سچ سامنے لانے اور جھوٹی اطلاعات کے سدباب کے لیے ہر قانونی و سیاسی اقدام کیا جائے گا۔
غیر مصدقہ خبروں کے بعد کارکنوں میں بڑھتی ہوئی تشویش کے پیشِ نظر پی ٹی آئی کا یہ مؤثر ردِعمل سامنے آیا ہے۔
