کراچی: شاہ لطیف ٹاؤن پولیس نے موبائل فون شاپس میں لوٹ مار کرنے والے دو مبینہ ڈاکوؤں کو گرفتار کر کے ان کے قبضے سے 37 مسروقہ موبائل فونز برآمد کرلیے۔
ترجمان ڈسٹرکٹ ملیر پولیس کے مطابق پولیس نے ٹیکنیکل بنیادوں پر کارروائی کرتے ہوئے اس گروہ کے دو کارندوں، وحید عرف بلیڈ اور ہجرت عرف کمانڈو، کو حراست میں لیا۔ ملزمان اسلحے کے زور پر اسٹریٹ کرائمز اور موبائل فون شاپس پر ڈکیتی کی وارداتوں میں ملوث تھے۔
ترجمان نے بتایا کہ گرفتار افراد چند روز قبل قائد آباد کی ایک موبائل فون شاپ سے 40 سے زائد قیمتی موبائل فونز لوٹ کر فرار ہوگئے تھے۔ پولیس نے ملزمان سے اسلحہ، گولیاں، نقدی اور 37 موبائل فونز برآمد کر لیے ہیں۔
پولیس کے مطابق دونوں ڈاکوؤں کے کرمنل ریکارڈ کی جانچ کی جارہی ہے جبکہ گروہ کے دیگر ساتھیوں کی تلاش کا عمل بھی جاری ہے۔
