کراچی: گلشنِ اقبال ہاکی اسٹیڈیم کے قریب شاپنگ بیگ سے انسانی دھڑ ملنے کے بعد علاقے میں خوف و ہراس پھیل گیا۔ پولیس کے مطابق انسانی دھڑ گلشن اقبال بلاک 5 پوسٹ آفس کے قریب شاپنگ بیگ میں پایا گیا، جس کی اطلاع ملتے ہی پولیس فوری طور پر موقع پر پہنچ گئی۔
پولیس نے جائے وقوع کو گھیرے میں لے کر کرائم سین یونٹ کو شواہد اکٹھا کرنے کے لیے طلب کرلیا۔ برآمد ہونے والا دھڑ قانونی کارروائی کے لیے ایدھی ایمبولینس کے ذریعے جناح اسپتال منتقل کردیا گیا۔
ایس ایچ او محمد نعیم راجپوت نے بتایا کہ نامعلوم ملزمان دھڑ وہاں پھینک کر فرار ہوئے۔ پولیس نے تحقیقات کا آغاز کر دیا ہے اور اطراف میں نصب سی سی ٹی وی کیمروں کی فوٹیج حاصل کی جا رہی ہے تاکہ ملزمان تک پہنچا جا سکے۔
