موسمِ سرما میں نزلہ، زکام اور کھانسی ہونا عام بات ہے، لیکن اگر یہ علامات شدت اختیار کر جائیں تو یقینی طور پر پریشانی کا باعث بنتی ہیں۔
نزلہ زکام اور کھانسی عام طور پر وائرل انفیکشن کی وجہ سے ہوتے ہیں جن کی علامات میں ناک بہنا، گلے میں خراش، چھینکیں اور کھانسی شامل ہیں۔
اس تکلیف کے گھریلو علاج کے طور پر ایک نہایت آسان اور آزمودہ نسخہ تجویز کیا جاتا ہے، جس کے استعمال سے نزلہ، زکام اور کھانسی میں آرام مل سکتا ہے۔
عام طور پر اس کیفیت میں آرام، زیادہ مقدار میں پانی یا دیگر سیال پینا، اور بھاپ لینا فائدہ مند ہوتا ہے۔ اس دوران دودھ کی بنی اشیاء، تلی ہوئی چیزیں اور الکحل جیسی چیزوں سے پرہیز کرنا بہتر ہے۔
نسخے کے مطابق تین چیزوں کی مدد سے فوری آرام حاصل کیا جا سکتا ہے: ادرک کا ایک چھوٹا سا ٹکڑا، دو عدد دارچینی اور ایک عدد لونگ۔ ان تینوں کو پانی میں ملا کر جوش دیں، اور جب قہوہ تیار ہو جائے تو حسبِ ذائقہ تھوڑا سا نمک شامل کرکے نوش کریں۔
اس قہوے کے فوائد میں نزلہ زکام، کھانسی، سینے کی جکڑن اور درد میں فوری آرام شامل ہے۔
