کراچی میں پولیس نے نیو کراچی اور سچل کے علاقوں میں اسٹریٹ کرائم میں ملوث افراد کے خلاف کارروائیاں کرتے ہوئے متعدد ملزمان کو گرفتار کرلیا۔ پولیس کے مطابق نیو کراچی میں مبینہ پولیس مقابلے کے دوران دو ملزمان زخمی حالت میں پکڑے گئے جبکہ مجموعی طور پر چار افراد کو حراست میں لیا گیا۔
پولیس نے بتایا کہ زخمی ملزمان کی شناخت ایاز حسین اور غلام مصطفیٰ کے ناموں سے ہوئی ہے جبکہ دیگر گرفتار ملزمان میں مہران اور اندیل عرف سونو شامل ہیں۔
کارروائی کے دوران ملزمان کے قبضے سے اسلحہ، موبائل فونز اور دو موٹر سائیکلیں برآمد کی گئیں جن کے بارے میں شبہ ہے کہ یہ مختلف وارداتوں میں استعمال ہوتی رہی ہیں۔ پولیس کے مطابق گرفتار ملزمان متعدد اسٹریٹ کرائم واقعات میں ملوث ہیں اور ان سے مزید تفتیش جاری ہے۔
ادھر سچل کے علاقے سمیرا چوک کے قریب ایک اور مبینہ پولیس مقابلے میں زخمی حالت میں ایک ڈاکو کو گرفتار کیا گیا جس کی شناخت وجاہت کے نام سے ہوئی۔ ریسکیو حکام کے مطابق ملزم کو طبی امداد کے لیے اسپتال منتقل کردیا گیا ہے۔
