بھارتی آل راؤنڈر ہارڈک پانڈیا نے اپنی دوست مہیکا شرما کی نازیبا زاویے سے ویڈیو بنانے پر پاپارازی کو سخت تنقید کا نشانہ بنایا اور سوشل میڈیا کے ذریعے بھرپور ناراضی کا اظہار کیا۔
کرکٹر کے مطابق ویڈیو ایسے رخ سے بنائی گئی جو نہ صرف غیر اخلاقی تھا بلکہ ذاتی حدود کی خلاف ورزی بھی کرتا ہے۔
انسٹاگرام اسٹوری میں پانڈیا نے لکھا، "میں جانتا ہوں کہ عوامی شخصیت ہونے کے ناطے توجہ اور تنقید دونوں کا سامنا کرنا پڑتا ہے، یہ اسی راستے کا حصہ ہے جسے میں نے چُنا ہے، مگر آج جو ہوا وہ کسی بھی حد سے بڑھ کر تھا۔”
انہوں نے بتایا کہ مہیکا صرف باندرہ کے ایک ریسٹورنٹ سے سیڑھیاں اتر رہی تھیں، لیکن فوٹوگرافرز نے انہیں ایسے زاویے سے فلمایا جس کی کوئی بھی خاتون مستحق نہیں ہوتی۔ ایک عام لمحے کو سستی سنسنی میں بدل دیا گیا۔
مزید کہتے ہوئے انہوں نے میڈیا سے درخواست کی کہ وہ نجی زندگی اور حدود کا احترام کریں۔
پانڈیا کا کہنا تھا، "یہ نہ خبر کا مسئلہ ہے نہ تصاویر کی دوڑ کا—یہ بنیادی احترام اور وقار کی بات ہے۔ خواتین عزت کی حقدار ہیں، ہر شخص کی اپنی حد ہوتی ہے۔ میڈیا کے دوستوں سے بھی کہوں گا کہ آپ کی محنت کی قدر ہے، مگر ہر منظر قید کرنا ضروری نہیں۔ انسانیت کو بھی جگہ دیں۔”
