اسلام آباد: ایف آئی اے کمرشل بینکنگ سرکل اسلام آباد نے جعلی پاکستانی کرنسی اسمگل کرنے کی کوشش ناکام بناتے ہوئے بس ڈرائیور کو گرفتار کر لیا اور 45 لاکھ روپے مالیت کے جعلی نوٹ برآمد کر لیے۔
ترجمان کے مطابق خفیہ اطلاع پر ایف آئی اے کی ٹیم نے اٹک ایم۔1 ٹول پلازہ کے قریب کارروائی کی اور نوشہرہ کے رہائشی راویز خان کو حراست میں لیا۔ ملزم کے قبضے سے 5 ہزار روپے مالیت کے 800 جعلی نوٹ برآمد ہوئے جن کی مجموعی مالیت 40 لاکھ روپے ہے۔ ملزم نے جعلی کرنسی نہایت مہارت سے اپنے کپڑوں کے اندر چھپا رکھی تھی اور یہ بس پشاور سے ملتان جا رہی تھی۔
ابتدائی تفتیش میں انکشاف ہوا کہ ملزم گزشتہ کئی ماہ سے جعلی کرنسی کی ترسیل میں ملوث نیٹ ورک کا حصہ ہے۔ وہ پشاور میں ایک رکشہ ڈرائیور سے جعلی نوٹ وصول کرتا اور ملتان میں ساتھی کے حوالے کر دیتا تھا۔
حکام کے مطابق ملزم کو ہر 1 لاکھ روپے کے جعلی نوٹ کی ترسیل کے بدلے 2 ہزار روپے کمیشن ملتا تھا، جبکہ وہ اس سے قبل بھی ملتان میں جعلی نوٹ پہنچا چکا ہے۔
ایف آئی اے نے تفتیش کا دائرہ مزید بڑھا دیا ہے اور جعلی نوٹ تیار کرنے اور سپلائی کرنے والے نیٹ ورک کے دیگر ارکان کی گرفتاری کے لیے چھاپے مارنے شروع کر دیے ہیں۔
