لاہور: اوکاڑہ ضلع میں زمین کے تنازع پر دو سال قبل قتل ہونے والی خاتون کے مقدمے میں پولیس نے مرکزی ملزم کو گرفتار کر لیا۔
پولیس کے مطابق ایس ایچ او کاہنہ نے خصوصی ٹیم کے ہمراہ کارروائی کرتے ہوئے ملزم کو کاہنہ کے علاقے سے ٹریس کرکے حراست میں لیا۔ یہ کارروائی ڈی آئی جی آپریشنز کی جانب سے اے ایس پی کاہنہ فصیح الرحمٰن کو دیے گئے اسپیشل ٹاسک کے تحت کی گئی۔
تفتیشی حکام کے مطابق ملزم فرخ اور مقتولہ منور بی بی کے درمیان حویلی لکھا، ضلع اوکاڑہ میں اراضی کا دیرینہ تنازع چل رہا تھا۔ ملزم نے رات کے وقت اپنے تین ساتھیوں کے ساتھ مل کر فائرنگ کی جس کے نتیجے میں خاتون موقع پر جاں بحق ہوگئیں۔ واقعے کے بعد فرخ گرفتاری سے بچنے کے لیے کاہنہ میں روپوش ہوگیا تھا۔
ایس پی ماڈل ٹاؤن شہربانو نقوی نے ملزم کی گرفتاری پر ایس ایچ او فہیم امداد اور ان کی ٹیم کی کارکردگی کو سراہتے ہوئے کہا کہ جرائم کے خاتمے کے لیے اسپیشل ٹیمیں تشکیل دے کر مسلسل کارروائیاں جاری ہیں۔
