لاہور میں ایف آئی اے نے بڑی کارروائی کرتے ہوئے لیسکو کے ایک اہلکار کو رشوت لیتے ہوئے رنگے ہاتھوں گرفتار کر لیا۔
ترجمان ایف آئی اے کے مطابق اینٹی کرپشن سرکل لاہور نے کارروائی کے دوران ملزم محمد عرفان کو شکایت کنندہ سے رشوت وصول کرتے ہوئے گرفتار کیا۔ ملزم لیسکو میں لائن سپرنٹنڈنٹ کے عہدے پر تعینات تھا اور لیسکو سب ڈویژن آفس جیا موسٰی میں فرائض انجام دے رہا تھا۔
ایف آئی اے حکام کے مطابق ملزم نے بجلی کا نیا کنکشن لگانے کے عوض رشوت طلب کی اور شکایت کنندہ سے 15 ہزار روپے وصول کیے، جس پر اسے موقع پر ہی گرفتار کر لیا گیا۔
ترجمان کا کہنا ہے کہ ملزم کے خلاف مقدمہ درج کر کے تفتیش کا آغاز کر دیا گیا ہے۔
