چیف پولیس چیمبر لائژن کمیٹی حفیظ عزیز نے کراچی میں تاجروں سے بھتہ خوری کے بڑھتے ہوئے واقعات پر تشویش کا اظہار کرتے ہوئے کہا ہے کہ وفاقی سطح پر مؤثر اقدامات نہیں کیے جا رہے۔
میڈیا سے گفتگو کرتے ہوئے حفیظ عزیز نے بتایا کہ انہوں نے وفاقی وزیر داخلہ محسن نقوی کو تاجروں سے بھتہ وصول کرنے والے عناصر کے خلاف ریڈ وارنٹ جاری کرنے کے لیے خط لکھا تھا، تاہم تاحال ایک بھی ریڈ وارنٹ جاری نہیں کیا گیا۔
ان کا کہنا تھا کہ اگر اختیارات دیے جائیں تو ایک ہفتے کے اندر کراچی میں امن قائم کیا جا سکتا ہے۔ انہوں نے کہا کہ مسئلہ اختیارات کا ہے، معلومات کا نہیں، کیونکہ ایجنسیاں بخوبی جانتی ہیں کہ بھتہ خوری کے نیٹ ورک کے پیچھے کون لوگ ہیں۔
حفیظ عزیز نے کہا کہ تاجر برادری کو صرف جان کا تحفظ چاہیے اور سوال یہ ہے کہ وہ کس سے تحفظ مانگے۔ ان کے مطابق بھتہ خور ایران اور دیگر ممالک میں بیٹھ کر دھمکیاں دیتے ہیں، اگر اتنے طاقتور ہیں تو کراچی آ کر سامنے آئیں۔
دوسری جانب آئی جی سندھ غلام نبی میمن نے بتایا کہ بلڈرز، تاجروں اور سرمایہ کاروں سے بھتہ وصولی کے واقعات پر پولیس نے تفصیلی رپورٹ تیار کر لی ہے، جس کے مطابق آباد (ABAD) کے اراکین سے متعلق بھتہ وصولی کے 8 واقعات رپورٹ ہوئے ہیں۔
پولیس رپورٹ کے مطابق پہلا واقعہ 27 ستمبر کو ملیر میں پیش آیا، جس کا مقدمہ اسی روز ملیر سٹی تھانے میں درج کیا گیا۔ 13 دسمبر کو قادری ہاؤس پر چھاپے کے دوران تین ملزمان کو گرفتار کیا گیا، جو ملیر میں بھتہ وصولی میں ملوث تھے۔ تحقیقات سے معلوم ہوا کہ بھتے کی کال ایران کے نمبر سے وصی اللہ لاکھو گروپ کی جانب سے کی گئی تھی۔
رپورٹ کے مطابق دوسرا واقعہ 30 ستمبر کو بہادرآباد میں پیش آیا، جہاں بھتے کی کال ایک بار پھر ایران کے نمبر سے موصول ہوئی۔ اس کیس میں خضر نامی ملزم کو گرفتار کیا گیا، جو آن لائن ایپلیکیشنز کے ذریعے بھتہ وصول کرتا تھا۔
پولیس رپورٹ میں بتایا گیا کہ تیسرا واقعہ 2 دسمبر کو سولجر بازار میں پیش آیا، جہاں دبئی کے نمبر سے بھتے کی کال کی گئی۔ اس کارروائی میں ایک ملزم مارا گیا جبکہ پانچ کو گرفتار کیا گیا۔ اسی علاقے میں دسمبر کے دوران ایران کے نمبر سے ایک اور کال موصول ہوئی، جس میں ایک ملزم کو گرفتار کیا گیا۔
مزید رپورٹ کے مطابق صدر کے علاقے میں بھتے کی پانچویں کال ایرانی نمبر سے موصول ہوئی، چھٹی کال گلشن اقبال میں ایک بلڈر کو نائیجریا کے نمبر سے کی گئی، جبکہ ناظم آباد میں بھی نائیجریا کے نمبر سے کال موصول ہونے پر درخشاں پولیس نے ملزم کو گرفتار کیا۔
پولیس نے بتایا کہ دسمبر میں گارڈن کے علاقے میں ایک بلڈر کو فلپائن کے نمبر سے بھتے کی کال موصول ہوئی۔ اسپیشل انویسٹی گیشن یونٹ نے قانون نافذ کرنے والے اداروں کے تعاون سے گینگ کے 8 ملزمان کو گرفتار کیا۔
آئی جی سندھ غلام نبی میمن نے کہا کہ کراچی سے جرائم کے خاتمے کے لیے پولیس اور دیگر ادارے دن رات کام کر رہے ہیں اور بہت جلد شہر میں جرائم پر مؤثر قابو پا لیا جائے گا۔
