پشاور میں ہفتے کی شب تھانہ متھرا کی حدود میں شادی کی تقریب کے دوران ہوائی فائرنگ کے واقعے پر پولیس نے فوری کارروائی کرتے ہوئے دُلہے کو گرفتار کر کے حوالات منتقل کر دیا۔
پولیس حکام کے مطابق گرفتار دُلہے کی شناخت طاہر شاہ کے نام سے ہوئی، جسے پھولوں کے ہار سمیت تحویل میں لیا گیا۔ واقعے کی تصاویر اور ویڈیوز سوشل میڈیا پر وائرل ہو گئیں، جن میں قانون کی عملداری واضح طور پر دیکھی جا سکتی ہے۔
حکام کا کہنا ہے کہ ہوائی فائرنگ انسانی جانوں کے لیے سنگین خطرہ ہے اور اس سے عوام میں خوف و ہراس پھیلتا ہے، اسی لیے ایسے واقعات پر کسی قسم کی رعایت نہیں دی جا رہی۔
دوسری جانب پشاور میں شادی بیاہ کی تقریبات کے دوران ہوائی فائرنگ کے بڑھتے ہوئے واقعات کے خلاف پولیس نے سخت کریک ڈاؤن شروع کر رکھا ہے، جس کے تحت رواں ماہ اب تک 11 دُلہوں کو ہوائی فائرنگ کے الزامات میں گرفتار کر کے حوالات بھیجا جا چکا ہے۔
