لاہور میں چوہنگ پولیس نے شہری کی کھوئی ہوئی 20 لاکھ روپے کی رقم برآمد کرتے ہوئے متعدد ملزمان کو حراست میں لے لیا۔
پولیس کے مطابق شہری ریحان بینک سے 20 لاکھ روپے نکال کر موٹرسائیکل پر گھر جا رہا تھا کہ راستے میں شاپر پھٹنے کے باعث رقم سڑک پر گر گئی۔
ایس پی صدر رانا حسین طاہر نے ایس ایچ او چوہنگ انسپکٹر محمد رضا کی سربراہی میں خصوصی ٹیم تشکیل دی، جس نے سیف سٹی کیمروں اور دیگر وسائل کی مدد سے مشکوک موٹرسائیکل سواروں کا سراغ لگا لیا۔
پولیس نے ایک مرد اور خاتون موٹرسائیکل سوار کو حراست میں لے کر ان کے قبضے سے 10 لاکھ روپے برآمد کرلیے، جبکہ مزید تفتیش کے دوران ایک اور موٹرسائیکل سوار کی نشاندہی ہوئی جس سے باقی 10 لاکھ روپے بھی وصول کرلیے گئے۔
ایس پی صدر کے مطابق مکمل 20 لاکھ روپے مدعی کے حوالے کر دیے گئے ہیں۔ انہوں نے کامیاب کارروائی پر خصوصی ٹیم اور ایس ایچ او محمد رضا کو شاباش دیتے ہوئے نقد انعام اور تعریفی اسناد کا اعلان کیا۔
مدعی مقدمہ نے رقم کی فوری برآمدگی پر ایس ایچ او محمد رضا اور پولیس ٹیم کا شکریہ ادا کیا۔
