گھوٹکی: سندھ کے ضلع گھوٹکی میں گڈو کشمور روڈ پر مسافر بس سے اغوا کیے گئے 19 افراد میں سے 11 کو بازیاب کرا لیا گیا ہے۔
ڈی ایس پی اوباڑو کے مطابق مغویوں کی بازیابی سومیانی کے علاقے میں مقابلے کے بعد عمل میں آئی۔ انہوں نے بتایا کہ باقی مغویوں کی بازیابی کے لیے علاقے میں ناکہ بندی کر دی گئی ہے تاکہ ملزمان فرار نہ ہو سکیں۔
پولیس اور رینجرز کی جانب سے ڈاکوؤں کا تعاقب جاری ہے، جبکہ آپریشن میں ڈرون کی مدد بھی حاصل کی جا رہی ہے۔
پولیس ذرائع کے مطابق پیر کی شب ڈاکوؤں نے گھوٹکی میں مرید شاخ کے قریب گڈو کشمور روڈ پر مسافر بس پر حملہ کیا اور 19 مسافروں کو اغوا کر لیا تھا۔
عینی شاہدین کا کہنا ہے کہ بس میں خواتین سمیت تقریباً 25 افراد سوار تھے، تاہم ڈاکو خواتین کو چھوڑ کر 19 مرد مسافروں کو اپنے ساتھ لے گئے۔
پولیس کے مطابق ملزمان نے واقعے کے دوران فائرنگ بھی کی جس کے نتیجے میں بس کے شیشے ٹوٹ گئے۔ مسافر بس صادق آباد سے کوئٹہ جا رہی تھی۔ واقعے کے بعد پولیس اور رینجرز کو فوری طور پر ڈاکوؤں کے تعاقب میں روانہ کر دیا گیا۔
