کراچی: کورنگی کے مختلف علاقوں میں پولیس کی وردی پہن کر وارداتیں کرنے والے چار ملزمان کو پولیس مقابلے کے دوران زخمی حالت میں گرفتار کر لیا گیا۔
پولیس کے مطابق ملزمان شہریوں سے لوٹ مار میں مصروف تھے کہ کورنگی نمبر تین کے قریب پولیس گشت پر مامور اہلکاروں سے ان کا سامنا ہوا، جس کے بعد فائرنگ کا تبادلہ ہوا اور چار ملزمان زخمی ہو گئے۔
ایس ایس پی کورنگی فدا حسین جانوری نے بتایا کہ گرفتار ملزمان کے قبضے سے پولیس یونیفارمز، اسلحہ، موٹر سائیکل، موبائل فونز اور لوٹی گئی نقدی برآمد کر لی گئی ہے۔ ملزمان پولیس وردی کا استعمال کرتے ہوئے گھروں میں پولیس چیکنگ کے بہانے داخل ہوتے اور ڈکیتی کی وارداتیں انجام دیتے تھے۔
پولیس کے مطابق مقابلے کے دوران ملزمان کے دو ساتھی فرار ہو گئے، جن کی گرفتاری کے لیے چھاپے مارے جا رہے ہیں۔ گرفتار ملزمان کی شناخت کامران، حمید، عمران اور رمضان کے ناموں سے ہوئی ہے، جو کورنگی کے مختلف علاقوں میں متعدد گھروں میں ڈکیتیوں میں ملوث رہے ہیں۔
پولیس نے زخمی ملزمان کو طبی امداد کے لیے اسپتال منتقل کر دیا ہے جبکہ واقعے کی مزید تفتیش جاری ہے۔
