راولپنڈی: تھانہ روات پولیس نے کارروائی کرتے ہوئے دو ہفتے قبل اپنی اہلیہ کو قتل کرنے اور الزام مقتولہ کے سابق شوہر پر ڈالنے والے شخص کو گرفتار کر لیا ہے۔
ترجمان راولپنڈی پولیس کے مطابق ملزم کے قبضے سے قتل میں استعمال ہونے والا پسٹل بھی برآمد کر لیا گیا ہے۔
پولیس کا کہنا ہے کہ ملزم نے فائرنگ کر کے اپنی اہلیہ کو قتل کیا اور خود کو معمولی زخمی کر کے واقعے کو سابق شوہر کی جانب سے حملہ ظاہر کرنے کی کوشش کی۔
تاہم، تفتیش کے دوران ملزم نے اپنی اہلیہ کے قتل اور خود ساختہ زخمی ہونے کا اعتراف کر لیا، جس کے بعد اس کی نشاندہی پر آلۂ قتل بھی برآمد کر لیا گیا۔
ایس پی صدر کے مطابق گرفتار ملزم کو ٹھوس شواہد کے ساتھ چالان کر کے عدالت پیش کیا جائے گا۔
