سندھ اسمبلی کے ڈپٹی اسپیکر کی رہائش گاہ کے قریب دودھ کی دکان میں ڈکیتی کی واردات پیش آئی، جہاں چار نامعلوم مسلح ملزمان نقدی اور دیگر سامان لوٹ کر فرار ہو گئے۔
تفصیلات کے مطابق محمودآباد اختر کالونی سیکٹر ڈی میں صبح سویرے مسلح افراد نے دودھ کی دکان کو نشانہ بنایا۔ سی سی ٹی وی فوٹیج کے مطابق دو موٹر سائیکلوں پر سوار چار نامعلوم ملزمان واردات کے لیے آئے۔ پہلے ایک ملزم اسلحہ کے ہمراہ دکان میں داخل ہوا، جس کے بعد مزید دو ملزمان بھی وہاں پہنچ گئے۔
مسلح ملزمان نے دودھ خریدنے آئے ایک شہری سے بھی لوٹ مار کی جبکہ دکاندار اور دکان کی دراز میں موجود رقم بھی چھین لی۔
متاثرہ دکاندار شاہد کے مطابق اس کی دکان کے ساتھ ہی سندھ اسمبلی کے ڈپٹی اسپیکر نوید انتھونی کی رہائش گاہ واقع ہے۔
واقعے کے وقت ڈپٹی اسپیکر کی سیکیورٹی پر مامور پولیس موبائل تو موجود تھی تاہم اس میں اہلکار موجود نہیں تھے، جس کے باعث ملزمان باآسانی واردات کے بعد فرار ہو گئے۔
