راولپنڈی: راولپنڈی کے تھانہ دھمیال کی حدود میں اسٹریٹ کرائم کا دل دہلا دینے والا واقعہ پیش آیا، جہاں گلی میں کھیلتی تین سالہ معصوم بچی کے کانوں سے زبردستی سونے کی بالیاں چھین کر ملزم فرار ہوگیا۔
پولیس کے مطابق واقعہ اشرف کالونی میں پیش آیا، جہاں نامعلوم شخص نے بچی کو نشانہ بنایا اور واردات کے فوراً بعد موقع سے فرار ہوگیا۔ واقعے کی سی سی ٹی وی فوٹیج منظرِ عام پر آ چکی ہے، جس میں ملزم کو تیزی سے گلی سے گزرتے دیکھا جا سکتا ہے۔
فوٹیج میں یہ بھی دیکھا جا سکتا ہے کہ معصوم بچی درد سے روتے ہوئے اور کان پر ہاتھ رکھ کر ملزم کے پیچھے بھاگتی ہے۔ پولیس کا کہنا ہے کہ بچی کے والد پرویز کی مدعیت میں مقدمہ درج کر لیا گیا ہے۔
واقعے پر سی پی او راولپنڈی خالد ہمدانی نے سخت نوٹس لیتے ہوئے ایس ایس پی آپریشنز اور ایس ایس پی انوسٹی گیشن کو ملزم کی فوری گرفتاری کے احکامات جاری کر دیے ہیں۔ پولیس ٹیمیں سی سی ٹی وی فوٹیج کی مدد سے ملزم کو ٹریس کرنے میں مصروف ہیں۔
