جنوری 21، 2025
ویب ڈیسک
مفتی منیب الرحمن کی قیادت میں علمائے کرام کے ایک وفد نے وفاقی وزیر داخلہ محسن نقوی اور وزیر مملکت داخلہ طلال چوہدری سے ملاقات کی۔ ملاقات میں مولانا لیاقت حسین اور مفتی عابد مبارک بھی شریک تھے۔
وفاقی وزیر داخلہ محسن نقوی نے ملک میں قیامِ امن، استحکام اور ہم آہنگی کے فروغ میں مفتی منیب الرحمن اور دیگر علمائے کرام کے کردار کو سراہا اور وفد کو درپیش مسائل کے حل کی یقین دہانی کرائی۔ ملاقات میں اس بات پر اتفاق کیا گیا کہ مسائل کا تفصیلی جائزہ لے کر ان کے حل کے لیے عملی اقدامات کیے جائیں گے۔
وزیر مملکت داخلہ طلال چوہدری کی سربراہی میں ایک کمیٹی تشکیل دینے کا فیصلہ کیا گیا، جس میں مفتی منیب الرحمن اور دیگر علمائے کرام بھی شامل ہوں گے۔ کمیٹی مسائل کے حل کے لیے قابلِ عمل سفارشات مرتب کرے گی۔
محسن نقوی نے کہا کہ مفتی منیب الرحمن سب کے لیے قابلِ احترام ہیں اور ہمیشہ اتحاد، اتفاق اور یکجہتی کا پیغام دیتے ہیں۔ طلال چوہدری نے کہا کہ علمائے کرام کی پاکستان کے لیے خدمات قابلِ تحسین ہیں۔
مفتی منیب الرحمن نے ملاقات کے اختتام پر ملک کی سالمیت، ترقی، استحکام اور خوشحالی کے لیے دعا کی۔
