کراچی: وزیراعلیٰ سندھ سید مراد علی شاہ نے بین الاقوامی یومِ تعلیم کے موقع پر اپنے پیغام میں کہا ہے کہ تعلیم ہر شہری کا بنیادی حق ہے اور حکومت سندھ تعلیم کے فروغ کو اپنی اولین ترجیح سمجھتی ہے۔
وزیراعلیٰ سندھ کا کہنا تھا کہ اس سال یومِ تعلیم کی تھیم نوجوانوں کے کردار کو اجاگر کرنا ہے، کیونکہ ملک کی ترقی میں نوجوانوں کا کردار نہایت اہم ہے۔ انہوں نے کہا کہ اسکول سے باہر بچوں کو دوبارہ تعلیمی نظام میں لانے کے لیے ہنگامی منصوبے شروع کیے جا چکے ہیں۔
مراد علی شاہ نے بتایا کہ سیلاب سے متاثرہ اسکولوں کی بحالی اور نئے کلاس رومز کی تعمیر کے منصوبے تیزی سے جاری ہیں تاکہ بچوں کی تعلیم متاثر نہ ہو۔ انہوں نے کہا کہ حکومت سندھ نے میرٹ کی بنیاد پر نئے اساتذہ بھرتی کیے ہیں اور اساتذہ کے تربیتی نظام کو بھی بہتر بنایا گیا ہے۔
وزیراعلیٰ سندھ کا مزید کہنا تھا کہ پبلک پرائیویٹ پارٹنرشپ کے تحت چلنے والے اسکولوں کا معیار کئی نجی تعلیمی اداروں سے بھی بہتر ہے، جو صوبے میں تعلیمی بہتری کا واضح ثبوت ہے۔
