اورنگی گلشنِ بہار میں دورانِ ڈکیتی مزاحمت پر پولیس اہلکار کو زخمی کرنے والا ملزم پاکستان بازار پولیس سے مبینہ مقابلے میں ہلاک ہو گیا۔
الطاف نگر پولیس مقابلے کی تفصیلات جاری کرتے ہوئے ڈی آئی جی ویسٹ عرفان بلوچ نے بتایا کہ ہلاک ملزم چند روز قبل ڈکیتی کی واردات کے دوران ایک پولیس اہلکار کو زخمی کرنے میں ملوث تھا اور پولیس کو مطلوب تھا۔
ڈی آئی جی ویسٹ کے مطابق ملزم کی گرفتاری کے لیے خصوصی ٹیم تشکیل دی گئی تھی اور پولیس تکنیکی معاونت کی مدد سے مسلسل اس تک پہنچنے کی کوشش کر رہی تھی۔ پولیس اہلکار کو زخمی کرنے کی سی سی ٹی وی فوٹیج بھی سامنے آچکی تھی، جس سے ملزم کی شناخت میں مدد ملی۔
انہوں نے بتایا کہ جب پولیس نے ملزم کی گرفتاری کے لیے چھاپہ مارا تو اس نے پولیس پارٹی پر فائرنگ کر دی، جس پر جوابی کارروائی کی گئی۔ فائرنگ کے تبادلے میں ملزم ہلاک ہو گیا۔
ڈی آئی جی ویسٹ نے مزید کہا کہ ہلاک ملزم کے سابقہ کریمنل ریکارڈ کی جانچ کی جا رہی ہے جبکہ واقعے کی مزید تحقیقات جاری ہیں۔
