کورنگی کے علاقے سنگر چورنگی کے قریب موٹرسائیکل سوار مسلح ملزمان نے پیٹرول پمپ کے کیشئیر سے 33 لاکھ روپے لوٹ لیے، جبکہ عوامی کالونی پولیس نے مقدمہ درج کر کے تفتیش شروع کر دی ہے۔
پولیس کے مطابق ڈکیتی کی واردات عوامی کالونی تھانے کی حدود سیکٹر 27 کورنگی انڈسٹریل ایریا میں پی ایس او پیٹرول پمپ کے قریب پیش آئی، جہاں دو موٹرسائیکلوں پر سوار تین مسلح ملزمان نے پیٹرول پمپ کے کیشئیر کو اسلحے کے زور پر روک کر نقد رقم چھین لی اور فرار ہو گئے۔
واقعے کی اطلاع فوری طور پر مددگار 15 ہیلپ لائن پر دی گئی، جس کے بعد پولیس موقع پر پہنچی اور فارنزک ٹیم کو طلب کر کے شواہد جمع کیے گئے۔
مدعی محمد عارف، جو پیٹرول پمپ پر بطور اکاؤنٹنٹ فرائض انجام دے رہا ہے، نے پولیس کو بتایا کہ وہ اپنے ساتھی کے ہمراہ موٹرسائیکل پر نقد رقم جمع کروانے جا رہا تھا کہ ملزمان نے اسے اسلحہ دکھا کر لوٹ لیا۔
پولیس کے مطابق ملزمان کم عمر اور غیر مقامی دکھائی دیتے تھے۔ واقعے کا مقدمہ درج کر کے تفتیش سی آئی سی کورنگی ڈویژن کے سپرد کر دی گئی ہے۔
