اسلام آباد: وفاقی دارالحکومت اسلام آباد میں معصوم بچوں کے استحصال میں ملوث ایک بڑے نیٹ ورک کے خلاف کارروائی کرتے ہوئے قانون نافذ کرنے والے اداروں نے ایک اہم ملزم کو گرفتار کرلیا، جس کے قبضے سے 600 سے زائد نازیبا ویڈیوز برآمد ہوئی ہیں۔
حکام کے مطابق گرفتار ملزم تیمور محمود کا تعلق مری سے ہے اور اسے راولپنڈی سے حراست میں لیا گیا۔ ابتدائی تفتیش میں انکشاف ہوا ہے کہ ملزم سوشل میڈیا پر خود کو لڑکی ظاہر کرکے کمسن بچوں کو ورغلاتا اور بعد ازاں ان کی نازیبا ویڈیوز بنا کر بلیک میل کرتا تھا۔
ملزم کے موبائل فون کے فرانزک تجزیے کے دوران مختلف واٹس ایپ گروپس کا سراغ ملا، جن کے ذریعے مقامی اور بیرون ممالک کے بچوں کی ویڈیوز اور تصاویر شیئر کی جاتی تھیں۔ تحقیقات کے مطابق یہ مواد بلیک میلنگ اور مالی فوائد حاصل کرنے کے لیے استعمال کیا جا رہا تھا۔
ملزم اور متعلقہ واٹس ایپ گروپس کے منتظمین کے خلاف پیکا ایکٹ کے تحت مقدمہ درج کر کے تحقیقات کا دائرہ وسیع کردیا گیا ہے۔ حکام کا کہنا ہے کہ اس نیٹ ورک کے ڈارک ویب سے ممکنہ روابط کا بھی جائزہ لیا جا رہا ہے۔
این سی سی آئی اے حکام کے مطابق ملزم سے مزید تفتیش جاری ہے جبکہ سہولت کاروں اور دیگر ملوث عناصر کی نشاندہی کے بعد مزید گرفتاریاں متوقع ہیں۔
