کراچی: شہر قائد میں رواں سال کی اب تک کی سب سے بڑی ڈکیتی کی واردات سامنے آ گئی، جہاں مسلح ملزمان نے ایک شہری سے گھر پہنچتے ہی 200 تولہ سونا اور ایک لاکھ امریکی ڈالر لوٹ لیے۔
پولیس کے مطابق یہ واقعہ 3 فروری کو بہادرآباد کے علاقے فاران سوسائٹی میں پیش آیا۔ متاثرہ شہری بینک کے لاکر سے سونا اور امریکی ڈالر لے کر جیسے ہی گھر پہنچا اور گیراج کا دروازہ کھلا، دو موٹر سائیکلوں پر سوار چار مسلح افراد اندر داخل ہو گئے اور اسلحے کے زور پر زیورات اور نقدی چھین کر فرار ہو گئے۔
پولیس کا کہنا ہے کہ شہری نے ملزمان کا کچھ فاصلے تک تعاقب کیا، تاہم تیز رفتاری کے دوران ایک بڑے اسپیڈ بریکر پر موٹر سائیکلوں کا توازن بگڑ گیا، جس کے باعث لوٹا گیا سونا سڑک پر بکھر گیا۔ آس پاس موجود بنگلوں کے سیکیورٹی گارڈز اور چوکیداروں کو دیکھ کر ملزمان فوری طور پر موقع سے فرار ہو گئے۔
اطلاع ملتے ہی پولیس موقع پر پہنچی اور بکھرا ہوا سونا تحویل میں لے لیا۔ پولیس کے مطابق تقریباً 90 فیصد سونا ریکور کر لیا گیا ہے جبکہ ملزمان کی تلاش کے لیے چھاپے مارے جا رہے ہیں۔
واقعے کا مقدمہ درج کر لیا گیا ہے، جس کی ایف آئی آر کے متن کے مطابق لوٹے گئے سونے اور رقم کی مجموعی مالیت 13 کروڑ روپے سے زائد بتائی گئی ہے۔
