محکمہ ایکسائز خیبرپختونخوا نے منشیات کے خلاف کارروائیاں تیز کرتے ہوئے ضلع مہمند اور صوابی میں مشترکہ گرینڈ آپریشن کا آغاز کردیا ہے۔
تفصیلات کے مطابق ضلع مہمند کی تحصیل امبار میں 37 ایکڑ پر کاشت کی گئی غیر قانونی پوست کی فصل کو تلف کردیا گیا۔
وزیراعلیٰ خیبرپختونخوا کی زیرو ٹالرنس پالیسی کے تحت بیر گلی صوابی میں بھی بڑے رقبے پر کاشت کی گئی پوست کی فصل تباہ کردی گئی۔یہ مشترکہ کارروائی محکمہ ایکسائز، ضلعی انتظامیہ، پولیس اور انسداد منشیات فورس (اے این ایف) کی جانب سے عمل میں لائی گئی۔
صوبائی وزیر سید فخر جہاں نے منشیات فروشوں اور اسمگلرز کے خلاف سخت اور بلاامتیاز کارروائیوں کے عزم کا اعادہ کیا اور منشیات سے پاک خیبرپختونخوا کے ہدف کے حصول کے لیے فیلڈ آپریشنز میں مزید تیزی لانے کی ہدایت جاری کی۔
حکام کے مطابق صوبے بھر میں یہ کارروائیاں جاری رہیں گی۔
