فیڈرل انویسٹی گیشن ایجنسی (ایف آئی اے) گوجرانوالہ زون نے عمرہ کے نام پر بڑے پیمانے پر فراڈ کرنے والے ملزمان کے خلاف کارروائی کرتے ہوئے مرکزی ملزمان کو گرفتار کرلیا۔
ایف آئی اے کے سرکل انسداد انسانی اسمگلنگ گجرات نے کارروائی کرتے ہوئے گجرات کے علاقے ڈنگہ میں قائم حاجی ٹریولز کے مالکان محمد جاوید بٹ اور محمد شاہد بٹ کو حراست میں لیا۔
ترجمان ایف آئی اے کے مطابق ملزمان پر الزام ہے کہ انہوں نے عمرہ کے نام پر 76 شہریوں سے فی کس 2 سے 3 لاکھ روپے وصول کیے اور انہیں جعلی رسیدیں اور جعلی ٹکٹ فراہم کیے۔ ملزمان کروڑوں روپے وصول کرنے کے بعد روپوش ہوگئے تھے۔
ایف آئی اے نے قبل ازیں دونوں ملزمان کے نام پروویژنل نیشنل آئیڈنٹیفکیشن لسٹ (PNIL) میں شامل کر رکھے تھے۔
ایف آئی اے ڈائریکٹر محمد بن اشرف نے کہا کہ مذہبی فریضے کی ادائیگی کے نام پر سادہ لوح شہریوں سے رقم بٹورنا ناقابل برداشت عمل ہے اور ملزمان کو قانون کے کٹہرے میں لایا جائے گا۔ واقعے کی مزید تفتیش جاری ہے۔
