عمر میں اضافے کے ساتھ خود کو صحت مند رکھنا چاہتے ہیں؟ تو ایسا بہت آسانی سے ممکن ہے۔
آپ کو 3 آسان عادات کو اپنا معمول بنانا ہوگا اور اچھی بات یہ ہے کہ اس کے لیے زیادہ محنت کی بھی ضرورت نہیں۔
آسٹریلیا کی سڈنی یونیورسٹی کی تحقیق میں بتایا گیا کہ روزمرہ کے معمولات میں 3 آسان تبدیلیوں کو اپنا کر آپ صحت کو بہتر اور زندگی کی مدت میں اضافہ کرسکتے ہیں۔
تحقیق میں بتایا گیا کہ روزانہ چند منٹ کی اضافی نیند اور ورزش کے ساتھ ذرا زیادہ مقدار میں سبزیوں کا استعمال اچھی صحت اور لمبی عمر کا حصول ممکن بناتا ہے۔
اس سے قبل متعدد تحقیقی رپورٹس میں بتایا گیا کہ غذا، ورزش اور نیند اچھی صحت کے لیے اہم ہوتے ہیں۔
مگر اس تحقیق میں یہ دیکھا گیا کہ یہ تینوں عناصر کس طرح ایک دوسرے کی مدد کرتے ہیں۔
تحقیق کے لیے 60 ہزار سے زائد افراد کے ڈیٹا کا تجزیہ کیا گیا اور ان کی نیند اور جسمانی سرگرمیوں کے دورانیے کو معلوم کیا گیا جبکہ غذائی عادات کی تفصیلات بھی حاصل کی گئیں۔
ان افراد کی صحت کا جائزہ 8 سال تک لیا گیا۔تحقیق کے مطابق ان عادات کو اپنانے سے متعدد دائمی امراض جیسے پھیپھڑوں کے امراض، ڈیمینشیا، امراض قلب، کینسر اور ذیابیطس ٹائپ 2 سے بچنے میں مدد ملتی ہے۔
محققین نے بتایا کہ غذا، ورزش اور نیند کے اس امتزاج کو روزمرہ کے معمولات کا حصہ بنانے سے زندگی کی مدت میں اضافہ ہوتا ہے۔
تحقیق میں بتایا گیا کہ کوئی فرد صحت کے لیے نقصان دہ طرز زندگی کو اپناتا ہے اگر وہ روزانہ نیند کے دورانیے میں 5 منٹ اور معتدل سے سخت جسمانی سرگرمیوں کے دوران میں 2 منٹ اضافہ کر دے جبکہ چند اضافی چمچ سبزیاں کھانا شروع کر دے، تو اوسط عمر میں ایک سال کا اضافہ ہو جائے گا۔
اسی طرح اگر 24 منٹ کی اضافی نیند، 4 منٹ کی اضافی ورزش اور ایک کپ سبزیوں اور سالم اناج کا استعمال عادت بنایا جائے تو زندگی کی مدت میں 4 سال کا اضافہ ہوسکتا ہے۔
تحقیق کے مطابق اگر کوئی فرد روزانہ 7 سے 8 گھنٹے سوتا ہے، دن بھر میں 40 منٹ سے زائد وقت تک ورزش کرتا ہے اور معیاری غذا کو معمول بناتا ہے تو اچھی صحت کے ساتھ زندگی کی مدت میں 9 سال کا اضافہ ہوسکتا ہے۔
