کراچی کے میئر مرتضیٰ وہاب نے متعلقہ حکام کو شہر کی بڑی شاہراہوں کے اطراف خوبصورتی کے مراکز قائم کرنے کی ہدایت کر دی۔
میئر نے کہا کہ اہم سڑکوں، چوراہوں اور عوامی مقامات کی ظاہری حالت بہتر بنانے پر خصوصی توجہ دی جائے۔ انہوں نے متعلقہ محکموں کو صفائی، شجرکاری، روشنی اور دیکھ بھال یقینی بنانے کی ہدایت کی۔
حکام کے مطابق اس منصوبے کے تحت شہر کی اہم شاہراہوں کو ترجیح دی جائے گی، جہاں روزانہ ہزاروں شہری سفر کرتے ہیں۔ اس اقدام کا مقصد شہر کی مجموعی خوبصورتی میں اضافہ اور شہریوں کو بہتر ماحول فراہم کرنا ہے۔
میئر نے بلدیاتی عملے کو تجاوزات ختم کرنے، کچرا صاف کرنے اور سبز پٹیوں سمیت سڑک کنارے علاقوں کی باقاعدہ دیکھ بھال کی ہدایت بھی کی۔
انہوں نے کہا کہ کراچی ملک کا سب سے بڑا شہر ہے، اس لیے اس کی مرکزی شاہراہوں کو صاف، خوبصورت اور منظم نظر آنا چاہیے۔
