کراچی: سندھ ڈرگ ٹیسٹنگ لیبارٹری کراچی نے مارکیٹ میں دستیاب سرنجوں کے 6 برانڈز کو غیر معیاری قرار دے دیا ہے۔
لیبارٹری رپورٹ کے مطابق کراچی کی مختلف مارکیٹوں سے 3 ایم ایل اور 5 ایم ایل سرنجوں کے نمونے حاصل کیے گئے تھے، جنہیں معیار اور حفاظتی اصولوں کے تحت جانچا گیا۔ ٹیسٹ کے دوران 6 برانڈز کی سرنجیں مطلوبہ معیار پر پوری نہ اتر سکیں۔
رپورٹ میں بتایا گیا کہ ان سرنجوں کا آٹو ڈس ایبل فیچر درست طریقے سے کام نہیں کر رہا تھا، جس کے باعث سرنج کے دوبارہ استعمال کا خدشہ پیدا ہو سکتا ہے۔
طبی ماہرین کے مطابق غیر معیاری یا دوبارہ استعمال ہونے والی سرنجیں ایچ آئی وی، ہیپاٹائٹس بی اور ہیپاٹائٹس سی جیسی خطرناک بیماریوں کے پھیلاؤ کا سبب بن سکتی ہیں۔
سندھ ڈرگ ٹیسٹنگ لیبارٹری کے ڈائریکٹر عدنان رضوی نے رپورٹ متعلقہ ڈرگ انسپکٹرز اور سیکریٹری کوالٹی کنٹرول بورڈ کراچی کو مزید کارروائی کے لیے بھجوا دی ہے۔
ذرائع کے مطابق 30 سے زائد سرنج برانڈز کے نمونے ٹیسٹ کیے گئے تھے، جن میں سے 6 کو غیر معیاری قرار دیا گیا۔ حکام کی جانب سے متاثرہ برانڈز کے خلاف مارکیٹوں میں کارروائی اور اسٹاک ضبط کیے جانے کا امکان ہے۔
