پاکستان میڈیکل اینڈ ڈینٹل کونسل نے بیرونِ ملک میڈیکل اور ڈینٹل کالجز میں داخلہ لینے کے خواہشمند پاکستانی طلبہ کے لیے سخت شرائط واضح کر دی ہیں۔
PMDC کے مطابق طلبہ داخلہ لینے سے پہلے یہ تصدیق کریں کہ متعلقہ غیر ملکی ادارہ PMDC کی منظور شدہ فہرست میں شامل ہے۔ غیر ملکی میڈیکل ڈگری لازمی طور پر ایلوپیتھک میڈیسن میں ہونی چاہیے اور متعلقہ ملک کے ریگولیٹری ادارے سے تسلیم شدہ ہو۔
نئی پالیسی کے تحت بیرونِ ملک تعلیم شروع کرنے سے پہلے طلبہ کے لیے PMDC اسٹوڈنٹ رجسٹریشن سرٹیفکیٹ حاصل کرنا ضروری ہوگا۔ ڈگری پروگرام کم از کم پانچ سال پر مشتمل ہونا چاہیے، جس میں 6200 تدریسی گھنٹے اور کم از کم 80 فیصد حاضری لازمی قرار دی گئی ہے۔
PMDC نے یہ بھی کہا ہے کہ جن ممالک میں ذریعہ تعلیم انگریزی نہیں، وہاں جانے والے طلبہ کو کم از کم پانچ ماہ مقامی زبان سیکھنے کے لیے گزارنا ہوں گے۔ تعلیم مکمل کرنے کے بعد پاکستان میں مکمل رجسٹریشن حاصل کرنے کے لیے طلبہ کو PMDC کا نیشنل رجسٹریشن ایگزامینیشن بھی پاس کرنا ہوگا۔
طلبہ کو بیرونِ ملک روانگی سے پہلے رہائش، رابطہ نمبرز اور مکمل مدتِ تعلیم کے لیے ملٹی پل انٹری ویزا کی تفصیلات بھی فراہم کرنا ہوں گی۔ PMDC نے طلبہ اور والدین کو ہدایت کی ہے کہ کسی بھی غیر ملکی میڈیکل ادارے میں داخلے سے قبل تمام شرائط اور ادارے کی منظوری کی تصدیق ضرور کریں۔
