جیکب آباد — سوشل میڈیا پر ایک انتہائی افسوسناک اور لرزہ خیز ویڈیو وائرل ہوئی ہے جس میں ایک نوجوان کو ہاتھ میں قرآن پاک اٹھا کر ایک بااثر وڈیرے سے معافی مانگنے پر مجبور کیا جا رہا ہے۔ رپورٹ کے مطابق، اس نوجوان کو یہ سنگین سزا محض سوشل میڈیا کی ایک پوسٹ پر تبصرہ (کمنٹ) کرنے کی وجہ سے دی گئی۔
ذرائع کے مطابق یہ واقعہ جیکب آباد کی یونین کونسل مبارک پور کے گاؤں نظام الدین مستوئی میں پیش آیا۔ ویڈیو میں واضح طور پر دیکھا جا سکتا ہے کہ نوجوان انتہائی بے بسی کی حالت میں قرآن پاک ہاتھ میں تھامے ہوئے بااثر وڈیرے کے سامنے گڑگڑا رہا ہے اور معافی مانگ رہا ہے۔
اس صورتحال کو مزید دردناک بناتے ہوئے ویڈیو میں دیکھا جا سکتا ہے کہ نوجوان کی بوڑھی ماں بھی اپنے بیٹے کی جان بخشی کے لیے وڈیرے کے سامنے منتیں کر رہی ہے اور شدید ذہنی دباؤ اور بے بسی میں اس نے اپنا دوپٹہ تک اتار کر سامنے رکھ دیا۔ بااثر شخصیت نے سوشل میڈیا پر کیے گئے ایک معمولی کمنٹ کی وجہ سے اس غریب خاندان کو شدید ہراساں کیا اور دباؤ میں لایا۔
اس واقعے کی ویڈیو سامنے آنے کے بعد عوامی اور سماجی حلقوں میں شدید غم و غصے کی لہر دوڑ گئی ہے اور شہریوں نے واقعے کی شفاف تحقیقات اور ذمہ داروں کے خلاف سخت قانونی کارروائی کا مطالبہ کیا ہے۔
واقعے کا فوری نوٹس لیتے ہوئے سینئر سپرنٹنڈنٹ آف پولیس (ایس ایس پی) جیکب آباد فیضان علی نے واقعے کی انکوائری کا حکم دے دیا ہے، جس کی سربراہی ڈپٹی سپرنٹنڈنٹ آف پولیس (ڈی ایس پی) کریں گے۔ ایس ایس پی نے عوام کو یقین دلایا ہے کہ انکوائری رپورٹ سامنے آتے ہی ملوث افراد کے خلاف سخت ترین قانونی کارروائی عمل میں لائی جائے گی۔
