مومبئی / لاس اینجلس — بالی ووڈ کے صفِ اول کے اداکار عامر خان نے اپنی قریبی دوست گوری سپریٹ (Gauri Spratt) کے ساتھ اپنی آنے والی شادی کی خبروں کی باقاعدہ تصدیق کر دی ہے اور ان کا کہنا ہے کہ وہ اس تقریب کو انتہائی سادہ اور نجی رکھنا چاہتے ہیں۔
میڈیا آؤٹ لیٹ ورائٹی انڈیا سے خصوصی گفتگو کرتے ہوئے 61 سالہ عامر خان نے انکشاف کیا کہ وہ اور گوری سپریٹ اگلے ماہ 5 جولائی 2026 کو شادی کے بندھن میں بندھنے جا رہے ہیں۔ روایتی بالی ووڈ شادیاں کے برعکس، یہ شادی ایک سادہ عدالتی (رجسٹرڈ) میرج ہوگی جو گھر پر ہی منعقد کی جائے گی، جس میں صرف دونوں خاندانوں کے قریبی افراد اور خاص دوست ہی شرکت کریں گے۔
اپنی زندگی کے اس نئے سفر پر بات کرتے ہوئے عامر خان نے اسے ایک انتہائی خوشگوار دور قرار دیا اور گوری کو اپنے لیے ایک "رحمت” کہا۔ تاہم، انہوں نے شوبز شخصیات کی ذاتی زندگیوں میں میڈیا اور عوام کی حد سے زیادہ مداخلت پر گہرے دکھ اور غصے کا اظہار بھی کیا۔ ان کا کہنا تھا، "مجھے سمجھ نہیں آتا کہ میڈیا میں اس قدر ہیجان کیوں برپا ہے۔ لوگوں کو ہمارے کام سے مطلب ہونا چاہیے، ہماری ذاتی زندگیوں سے نہیں۔ مجھے نہیں معلوم کہ میری شادی کی معلومات کیسے لیک ہوئیں، آج کل کسی بھی چیز کی رازداری برقرار نہیں رہی۔”
عامر خان اور گوری سپریٹ کے تعلقات کی تاریخ دو دہائیوں سے زیادہ پرانی ہے۔ دونوں کی پہلی ملاقات تقریباً 25 سال پہلے ہوئی تھی جس کے بعد ان کا رابطہ منقطع ہو گیا۔ برسوں بعد جب وہ دوبارہ ملے، تو ان کی یہ پرانی دوستی رفتہ رفتہ محبت میں بدل گئی۔ اداکار نے گزشتہ سال مارچ 2025 میں اپنی 60 ویں سالگرہ کے موقع پر پہلی بار گوری کو میڈیا سے ملوایا تھا اور اپنے رشتے کا عوامی سطح پر اعتراف کیا تھا۔
واضح رہے کہ یہ عامر خان کی تیسری شادی ہوگی۔ اس سے قبل ان کی پہلی شادی رینا دتہ سے 1986 میں ہوئی تھی جو 2002 میں طلاق پر ختم ہوئی، ان کے دو بچے جنید خان اور ایرا خان ہیں۔ بعد ازاں، عامر خان نے 2005 میں فلم میکر کرن راؤ سے دوسری شادی کی، جس کا خاتمہ 2021 میں علیحدگی کی صورت میں ہوا، تاہم دونوں مل کر اپنے بیٹے آزاد راؤ خان کی پرورش کر رہے ہیں۔
