اسلام آباد — صدر آصف علی زرداری اور وزیراعظم شہباز شریف نے وینزویلا میں تباہ کن زلزلوں کے نتیجے میں قیمتی انسانی جانوں کے ضیاع پر گہرے رنج و غم کا اظہار کیا ہے۔
دونوں رہنماؤں نے اپنے الگ الگ پیغامات میں وینزویلا کی حکومت اور عوام سے تعزیت کا اظہار کرتے ہوئے بالخصوص ان خاندانوں سے ہمدردی کی جنہوں نے اس سانحے میں اپنے عزیزوں کو کھو دیا۔ انہوں نے زخمیوں کی جلد صحت یابی کے لیے بھی نیک خواہشات کا اظہار کیا۔
صدر اور وزیراعظم نے اس مشکل وقت میں وینزویلا کے ساتھ پاکستان کی مکمل یکجہتی کا اعادہ کرتے ہوئے امید ظاہر کی کہ جاری امدادی اور بحالی کی سرگرمیاں متاثرہ افراد اور علاقوں کو اس سانحے سے نکلنے میں مدد فراہم کریں گی۔
