سندھ حکومت نے جیلوں کے نظام کو جدید بنانے کی جانب ایک اور اہم قدم اٹھاتے ہوئے سینٹرل پریزن کراچی اور ڈسٹرکٹ پریزن ملیر میں انڈر ٹرائل قیدیوں کی ویڈیو لنک کے ذریعے عدالتی پیشی کی سہولت کا آغاز کر دیا ہے۔ اس اقدام کا مقصد عدالتی کارروائی کو زیادہ تیز، محفوظ اور مؤثر بنانا ہے۔
اس سہولت کا افتتاح چیف جسٹس سندھ ہائی کورٹ جسٹس ظفر احمد راجپوت نے کیا۔ اس موقع پر آئی جی سندھ پرزنز اینڈ کریکشن سروس فدا حسین مستوئی (QPM, PSP)، عدالتی افسران اور جیل حکام بھی موجود تھے۔ تقریب کے دوران چیف جسٹس کو ویڈیو لنک سسٹم کا عملی مظاہرہ پیش کیا گیا، جس کے ذریعے انڈر ٹرائل قیدی جیل سے ہی عدالت میں پیش ہو سکیں گے۔
اس جدید نظام سے قیدیوں کی عدالتوں تک منتقلی کی ضرورت میں کمی آئے گی، سیکیورٹی خدشات کم ہوں گے اور سرکاری وسائل کی بھی بچت ممکن ہوگی۔ اس کے ساتھ عدالتی کارروائی کو مزید مؤثر اور بروقت بنانے میں بھی مدد ملے گی۔
دورے کے دوران چیف جسٹس سندھ ہائی کورٹ نے جیلوں میں جاری اصلاحی، بحالی اور فلاحی اقدامات کا بھی جائزہ لیا۔ انہوں نے سندھ پرزنز اینڈ کریکشن سروس کی جانب سے جیلوں کی بہتری اور جدید ٹیکنالوجی کے استعمال کے لیے کیے جانے والے اقدامات کو سراہا۔
ویڈیو لنک سہولت کا آغاز سندھ کی جیلوں میں ڈیجیٹلائزیشن اور اصلاحات کے سفر میں ایک اہم پیش رفت ہے، جس سے نہ صرف عدالتی نظام مزید مؤثر ہوگا بلکہ قیدیوں کی فلاح اور جیل انتظامیہ کی کارکردگی میں بھی بہتری آئے گی۔
