حیدرآباد — حیدرآباد میں اتوار کے روز وقفے وقف سے ہونے والی بارش کے باعث نظامِ زندگی شدید متاثر ہوا، شہر کی اہم شاہراہیں اور تجارتی مراکز زیرِ آب آگئے جبکہ طویل بریک ڈاؤن سے بجلی کا نظام بھی درہم برہم ہو گیا۔ محکمہ موسمیات کے مطابق لطیف آباد میں 42 ملی میٹر جبکہ سٹی آفس میں 40 ملی میٹر بارش ریکارڈ کی گئی ہے۔ حیدرآباد الیکٹرک سپلائی کمپنی (حیسکو) کے مطابق بارش کے باعث 722 میں سے 285 گیارہ کے وی فیڈرز پر بجلی کی فراہمی معطل رہی۔ بجلی کی بندش کی وجہ سے واٹر اینڈ سیوریج کارپوریشن کے پمپنگ اسٹیشنز بھی بند ہو گئے، جس سے سٹی کلوتھ مارکیٹ، ٹاور مارکیٹ اور اناج منڈی سمیت کئی علاقوں میں کاروباری سرگرمیاں مکمل طور پر معطل رہیں۔
صوبے کے دیگر حصوں میں بھی بارش کا سلسلہ جاری رہا جہاں متی ضلع میں سب سے زیادہ 126 ملی میٹر بارش ریکارڈ کی گئی، جبکہ چھور میں 81 اور بدین میں 69 ملی میٹر بارش ہوئی۔ محکمہ موسمیات نے پہلے ہی سندھ، پنجاب اور بلوچستان کے مختلف حصوں میں چار اگست تک مزید تیز بارشوں کی پیشگوئی کی ہے۔
