کویت سٹی: وزیر صحت ڈاکٹر احمد العوضی نے ایک نئے وزارتی حکم نامے کے تحت کویت میں نرسنگ اور مڈوائفری کے شعبے سے وابسته ملکی اور غیر ملکی عملے کے لیے بہتر الاؤنسز اور بونسز کی منظوری دے دی ہے۔ وزارتِ صحت کی جانب سے جاری کردہ وزارتی قرارداد نمبر 206 مجریہ 2026 کے تحت نرسنگ اور مڈوائفری کے عہدوں پر نظرثانی شدہ ماہانہ الاؤنسز اور تکنیکی لحاظ سے درجہ بندی پر مبنی جاب ٹائٹلز نافذ کر دیے گئے ہیں، جن کی بنیاد ملازمین کا عہدہ، تجربہ اور کیریئر کی ترقی ہے۔
کوئیتی نرسنگ اور مڈوائفری اسٹاف کے لیے سب سے زیادہ ماہانہ الاؤنس 1,510 کویتی دینار مقرر کیا گیا ہے، جو ہیڈ نرسنگ اسپیشلسٹ اور ہیڈ مڈوائفری اسپیشلسٹ کو دیا جائے گا۔ دیگر درجات میں سینئر نرسنگ / مڈوائفری اسپیشلسٹ کے لیے 1,430 دینار، نرسنگ / مڈوائفری اسپیشلسٹ کے لیے 1,350 دینار، سینئر نرس / سینئر مڈوائف کے لیے 1,170 دینار، نرس / مڈوائف کے لیے 1,110 دینار، اور اسسٹنٹ نرس / اسسٹنٹ مڈوائف کے لیے 1,040 کویتی دینار شامل ہیں۔ ان الاؤنسز میں کام کی نوعیت، جاب لیول بونس، انسینٹیو الاؤنس، مہنگائی الاؤنس، شفٹ الاؤنس، سپروویژن الاؤنس، ٹریننگ الاؤنس اور آن کال الاؤنس شامل ہیں۔
غیر ملکی (نان کوئیتی) نرسنگ اور مڈوائفری عملے کے لیے بھی نظرثانی شدہ الاؤنسز طے کیے گئے ہیں، جن میں کام کی نوعیت کا الاؤنس، جاب لیول بونس، مہنگائی الاؤنس، شفٹ الاؤنس، سپروویژن اور ٹریننگ بونس شامل ہیں، جبکہ نرسوں اور اسسٹنٹ نرسوں کے لیے آن کال الاؤنسز کو بھی شامل کیا گیا ہے۔ قرارداد میں نرسنگ سروسز ٹیکنیشینز کے لیے بھی خصوصی الاؤنسز کا اعلان کیا گیا ہے؛ کوئیتی سینئر نرسنگ سروسز ٹیکنیشین (کیٹیگری اے) کے لیے کام کا الاؤنس 230 کویتی دینار تک، جاب لیول بونس 160 دینار، انسینٹیو بونس 240 دینار، مہنگائی الاؤنس 120 دینار اور آن کال الاؤنس 160 دینار مقرر کیا گیا ہے جبکہ غیر ملکی سینئر ٹیکنیشینز کے لیے کام کا الاؤنس 130 دینار، جاب لیول بونس 60 دینار، مہنگائی الاؤنس 50 دینار اور آن کال الاؤنس 100 دینار ہوگا۔
نرسنگ یا مڈوائفری میں اسپیشلائزڈ یونیورسٹی ڈگری حاصل کرنے والے کوئیتی گریجویٹس کے لیے خصوصی ماہانہ بونس منظور کیے گئے ہیں جن میں سینئر اسپیشلسٹ کے لیے 500 اور 400 دینار، اسپیشلسٹ کے لیے 300 دینار، سینئر نرس کے لیے 200 دینار اور نرس کے لیے 100 کویتی دینار شامل ہیں۔ علاوہ ازیں، اعلیٰ تعلیمی ڈگریوں کے حامل نرسوں کے لیے ماہانہ تعلیمی الاؤنس بھی منظور کیا گیا ہے جس کے تحت کوئیتی نرسز کو پی ایچ ڈی پر 150 دینار اور ماسٹرز پر 75 دینار جبکہ غیر ملکی نرسز کو پی ایچ ڈی پر 50 دینار اور ماسٹرز پر 25 دینار ماہانہ ملیں گے، جو اس شرط کے ساتھ دیے جائیں گے کہ متعلقہ تعلیمی اسناد سرکاری طور پر تسلیم شدہ اور نرسنگ کے شعبے سے مطابقت رکھتی ہوں۔
