اسلام آباد (نمائندہ خصوصی) — بھارتی جارحیت کے جواب میں پاکستان نے نہ صرف عسکری محاذ پر مؤثر کارروائیاں کیں بلکہ ڈیجیٹل محاذ پر بھی دشمن کو سخت پیغام دیا۔ پاکستانی سائبر ٹیموں نے حالیہ دنوں میں بھارت کے اہم دفاعی اور توانائی سے متعلق اداروں کی متعدد ویب سائٹس کو ہیک کر کے نہ صرف انہیں ناکارہ بنایا بلکہ ان کا حساس ڈیٹا بھی حاصل کر لیا۔
ذرائع کے مطابق ہیک کی گئی ویب سائٹس میں آسام رائفلز، ڈپارٹمنٹ آف اٹامک انرجی کا پورٹل اور انڈین ڈیفنس پروڈکشن شامل ہیں۔ ان سائٹس پر پاکستانی ہیکرز نے "بھارت دہشتگردی کی آماجگاہ ہے” اور "انڈین دہشتگردی کے ثبوت” جیسے پیغامات آویزاں کیے، جو بعد ازاں سوشل میڈیا پر بھی وائرل ہو گئے۔
ذرائع کا یہ بھی کہنا ہے کہ انڈین ڈیفنس پروڈکشن کی ویب سائٹ سے حاصل کردہ حساس معلومات کو ڈارک ویب پر فروخت کے لیے پیش کیا جا چکا ہے، جس پر بھارتی سیکیورٹی اداروں میں کھلبلی مچ گئی ہے۔
اس سے قبل پاکستانی سائبر ٹیم نے مہاراشٹرا اسٹیٹ الیکٹرسٹی ٹرانسمیشن کمپنی لمیٹڈ (MSETCL) پر بھی سائبر حملہ کیا تھا، جس کے نتیجے میں ریاست بھر کی بجلی بند ہو گئی تھی۔ اس حملے میں نہ صرف بجلی کی فراہمی متاثر ہوئی بلکہ تمام کمرشل اور ڈومیسٹک میٹرز کا ریکارڈ بھی ضائع کر دیا گیا۔
بھارتی میڈیا اور حکومتی ادارے فی الحال ان دعوؤں پر مکمل خاموشی اختیار کیے ہوئے ہیں، تاہم سیکیورٹی ماہرین اس صورتحال کو انتہائی سنگین قرار دے رہے ہیں۔
