کرکٹ آسٹریلیا نے اعلان کیا ہے کہ آئی پی ایل میں آسٹریلوی کھلاڑیوں کی شرکت کا فیصلہ انفرادی ہوگا، اور بورڈ کھلاڑیوں کے ذاتی فیصلوں کا مکمل احترام کرے گا۔
کرکٹ آسٹریلیا نے اپنے بیان میں کہا کہ بھارت واپس جانے یا نہ جانے کا فیصلہ کھلاڑی خود کریں گے اور بورڈ ان کے فیصلے کی حمایت کرے گا۔ ساتھ ہی، ٹیم مینجمنٹ آئی سی سی ورلڈ ٹیسٹ چیمپئن شپ فائنل کی تیاریوں کا بھی جائزہ لے رہی ہے۔
کرکٹ آسٹریلیا نے مزید کہا کہ جو کھلاڑی آئی پی ایل کے لیے بھارت واپس جائیں گے، ان کی ٹیسٹ چیمپئن شپ کی تیاریوں پر پڑنے والے اثرات کا جائزہ لیا جائے گا۔ سکیورٹی انتظامات کے حوالے سے آسٹریلوی حکومت اور بھارتی کرکٹ بورڈ سے رابطے میں ہیں۔
یاد رہے کہ پاک بھارت جنگ بندی کے بعد آئی پی ایل کو 17 مئی سے دوبارہ شروع کرنے کا اعلان کیا گیا ہے، جبکہ ایونٹ کا فائنل 3 جون کو ہوگا۔ اس کے بعد آئی سی سی ورلڈ ٹیسٹ چیمپئن شپ فائنل 11 جون سے شیڈول ہے۔
9 مئی کو جنگی صورتحال کے باعث آئی پی ایل معطل کر دی گئی تھی اور آسٹریلوی کھلاڑی واپس وطن لوٹ گئے تھے۔
