گورنر سندھ سید محمد نہال ہاشمی سے آسٹریا کے اعزازی قونصل جنرل ڈاکٹر حسین اسلام نے ملاقات کی، جس میں پاکستان اور آسٹریا کے باہمی تعلقات، تجارت، سرمایہ کاری اور اقتصادی تعاون کے فروغ سے متعلق مختلف امور پر تبادلہ خیال کیا گیا۔
ملاقات میں آسٹرین فنکار Robert Pawlik اور Ms. Michaela Rabitsch سمیت دیگر شخصیات نے شرکت کی، جبکہ الحمد انٹرنیشنل کنٹینر ٹرمینل کی چیف ایگزیکٹو آفیسر توشنا پٹیل بھی موجود تھیں۔
ملاقات کے دوران کراچی میں غیر ملکی سرمایہ کاری اور کاروباری سرگرمیوں کے فروغ کے امکانات پر بھی گفتگو ہوئی۔ گورنر سندھ نے غیر ملکی سرمایہ کاروں اور کاروباری شخصیات کو ہر ممکن تعاون فراہم کرنے کے عزم کا اظہار کیا۔
سید محمد نہال ہاشمی نے کہا کہ موسیقی کی کوئی سرحد نہیں ہوتی، یہ دلوں اور ثقافتوں کو ایک دوسرے سے جوڑتی ہے۔ انہوں نے کہا کہ پاکستان مختلف مذاہب، زبانوں اور ثقافتوں کا حسین امتزاج ہے اور یہاں ہر شخص کو امن و سکون کے ساتھ رہنے کا حق حاصل ہے۔
گورنر سندھ نے مزید کہا کہ موسیقی مختلف قوموں اور ثقافتوں کے درمیان محبت، ہم آہنگی اور دوستی کو فروغ دینے کا خوبصورت ذریعہ ہے۔
اس موقع پر آسٹریا کے اعزازی قونصل جنرل ڈاکٹر حسین اسلام نے کہا کہ پاکستان اور آسٹریا تجارتی و اقتصادی تعاون کو مزید مستحکم کرنے کے خواہاں ہیں۔
آسٹرین فنکار Robert Pawlik نے پاکستانی عوام کی مہمان نوازی اور پاکستانی کھانوں کو سراہتے ہوئے کہا کہ پاکستان کی شاندار مہمان نوازی اور لذیذ کھانوں نے انہیں بے حد متاثر کیا۔
Ms. Michaela Rabitsch نے پاکستان کی ثقافت، لوگوں کی محبت اور مہمان نوازی کو یادگار تجربہ قرار دیتے ہوئے کہا کہ وہ دوبارہ پاکستان آنا چاہیں گی۔
