پاکستان کی اولین خلائی موضوع پر مبنی ٹیلی فلم "جہاں اور بھی ہیں – Beyond the Blue” کا آج انسٹی ٹیوٹ آف اسپیس ٹیکنالوجی (IST)، اسلام آباد میں باقاعدہ پریمیئر ہوا۔ 38 منٹ دورانیے پر مشتمل یہ سائنسی فکشن ڈرامہ IST، نیشنل سینٹر آف جی آئی ایس اینڈ اسپیس ایپلی کیشنز (NCGSA)، اور ہائر ایجوکیشن کمیشن (HEC) کی مشترکہ پیشکش ہے۔
ٹیلی فلم میں اداکارہ آمنہ الیاس اور اداکار دانیال راحیل مرکزی کرداروں میں جلوہ گر ہیں۔ کہانی ایک دیہی گاؤں کے گرد گھومتی ہے جو ماحولیاتی تباہی کے دہانے پر ہے۔ فلم میں ایک سائنس پروفیسر سیٹلائٹ امیجری اور ریموٹ سینسنگ ٹیکنالوجی کی مدد سے ایک ممکنہ طوفانی بارش (Cloudburst) کی پیش گوئی کرتی ہے، تاکہ اپنی کمیونٹی کو بروقت بچایا جا سکے۔
یہ ٹیلی فلم خلائی سائنس اور ماحولیاتی تحفظ کو یکجا کرتے ہوئے نہ صرف سائنسی شعور اجاگر کرنے کی کوشش ہے بلکہ قدرتی آفات سے بچاؤ کے لیے آگاہی کا ذریعہ بھی ہے۔ اس کا پریمیئر ورلڈ انوائرنمنٹ ڈے سے قبل حکمتِ عملی کے تحت رکھا گیا ہے، جبکہ فلم کو 5 جون کو پی ٹی وی پر بھی نشر کیا جائے گا۔
