پاکستان میڈیکل اینڈ ڈینٹل کونسل (پی ایم ڈی سی) نے بیچلر آف ڈینٹل سرجری (بی ڈی ایس) پروگرام کو چار سال سے بڑھا کر پانچ سال کرنے کا باضابطہ اعلان کر دیا ہے۔ اس فیصلے کا اطلاق تعلیمی سال 2024-2025 سے ہوگا۔
پی ایم ڈی سی کے صدر، پروفیسر ڈاکٹر رضوان تاج کے مطابق، یہ اقدام پاکستانی گریجویٹس کو عالمی سطح پر تربیت اور ملازمتوں کے مواقع حاصل کرنے میں درپیش رکاوٹوں کو مدنظر رکھتے ہوئے کیا گیا ہے۔ نئے پانچ سالہ پروگرام میں پانچواں سال کلرک شپ پر مشتمل ہوگا، جس کے بعد ایک سال کی اسٹرکچرڈ ہاؤس جاب یا انٹرن شپ کی جائے گی۔
ڈاکٹر رضوان کا کہنا ہے کہ اضافی تعلیمی سال سے طلبہ کو ڈینٹل سائنسز کی بہتر نظریاتی سمجھ حاصل ہوگی، جو ان کے تعلیمی معیار میں بہتری لائے گی۔ اس تبدیلی سے پاکستان کا ڈینٹل ایجوکیشن سسٹم بین الاقوامی معیارات سے ہم آہنگ ہوگا اور پاکستانی گریجویٹس کو عالمی سطح پر مزید پہچان حاصل ہوگی۔ یہ اقدام گریجویٹس کو جدید مہارتوں اور علم سے لیس کرے گا۔
