کراچی: معروف سوشل میڈیا انفلوئنسر اریقا حق نے ٹک ٹاکرز کے حوالے سے حیران کن انکشاف کرتے ہوئے کہا ہے کہ کچھ افراد خود ہی اپنی نامناسب ویڈیوز لیک کر کے شہرت حاصل کرنے کی کوشش کرتے ہیں۔
ایک حالیہ انٹرویو میں اریقا حق نے دعویٰ کیا کہ سوشل میڈیا پر وائرل ہونے والے کئی اسکینڈلز درحقیقت سوچی سمجھی حکمتِ عملی کے تحت کیے جاتے ہیں۔ اُن کا کہنا تھا کہ ان ویڈیوز کا مقصد صرف اور صرف شہرت حاصل کرنا، فالوورز بڑھانا اور برانڈز کی توجہ حاصل کرنا ہوتا ہے۔
اریقا کا کہنا تھا: "یہ ویڈیوز محض اتفاقیہ لیک نہیں ہوتیں، کئی بار خود ٹک ٹاکرز ہی انہیں وائرل کرواتے ہیں تاکہ سوشل میڈیا پر چرچے ہوں۔”
انہوں نے نوجوان نسل پر ایسے مواد کے منفی اثرات پر تشویش کا اظہار کرتے ہوئے والدین سے اپیل کی کہ وہ اپنے بچوں کی آن لائن سرگرمیوں پر نظر رکھیں۔ انہوں نے سوشل میڈیا صارفین سے بھی مطالبہ کیا کہ وہ ایسے بے بنیاد اور اخلاقی حدود سے گرے ہوئے مواد کو پھیلانے میں اپنا کردار ادا نہ کریں۔
اریقا حق کے اس بیان کے بعد سوشل میڈیا پر ملا جلا ردِعمل دیکھنے میں آیا ہے، جہاں کچھ افراد نے ان کے خیالات کی تائید کی ہے وہیں کچھ نے اس پر تنقید بھی کی ہے۔
پاکستان میں سوشل میڈیا کے بڑھتے ہوئے اثر و رسوخ کے ساتھ ساتھ اس قسم کے موضوعات پر بحث مزید زور پکڑتی جا رہی ہے، اور یہ سوال جنم لے رہا ہے کہ کیا شہرت حاصل کرنے کے لیے ہر حد پار کرنا جائز ہے؟
