وزیراعظم پاکستان شہباز شریف دو روزہ سرکاری دورے پر جمعرات کے روز سعودی عرب کے شہر جدہ پہنچ گئے۔ یہ دورہ سعودی ولی عہد و وزیراعظم محمد بن سلمان بن عبدالعزیز آل سعود کی دعوت پر کیا جا رہا ہے۔
جدہ پہنچنے پر گورنر جدہ شہزادہ سعود بن عبداللہ الجلوی، سعودی عرب میں پاکستان کے سفیر احمد فاروق، پاکستان میں سعودی سفیر نواف بن سعید المالکی اور دیگر اعلیٰ حکام نے وزیراعظم کا پرتپاک استقبال کیا۔
وزیراعظم کے ہمراہ پاکستانی وفد نے جدہ سے مکہ مکرمہ روانہ ہو کر عمرہ کی سعادت حاصل کی۔
وزارتِ خارجہ کے مطابق وزیراعظم شہباز شریف اس دورے کے دوران سعودی ولی عہد محمد بن سلمان سے اہم ملاقات کریں گے۔ بات چیت میں تجارت، سرمایہ کاری، مسلم امہ کی فلاح و بہبود، اور خطے میں امن و استحکام کے امور پر تبادلہ خیال کیا جائے گا۔
اس موقع پر وزیراعظم سعودی قیادت کا پاکستان اور بھارت کے درمیان حالیہ کشیدگی کم کرنے میں مثبت کردار ادا کرنے پر شکریہ بھی ادا کریں گے۔
یہ دورہ پاکستان اور سعودی عرب کے دیرینہ برادرانہ تعلقات کی ایک اور مضبوط مثال ہے، جو باہمی احترام، مشترکہ عقیدے اور اسٹریٹجک شراکت داری پر مبنی ہیں۔ دورہ سعودی وژن 2030 اور پاکستان کی ترقیاتی ترجیحات کے ساتھ ہم آہنگ اقتصادی و سفارتی تعاون کو مزید مضبوط کرنے کی کوشش ہے۔
گزشتہ ہفتے وزیراعظم شہباز شریف نے چار ممالک کا کامیاب سفارتی دورہ مکمل کیا تھا، جس کا مقصد علاقائی تعاون کو مضبوط کرنا اور بھارت کے ساتھ بڑھتی ہوئی کشیدگی کے پس منظر میں سفارتی توازن قائم رکھنا تھا۔
