بھارت کے معروف کامیڈین اور مہنگے ترین ٹی وی میزبان کپل شرما ایک بار پھر اپنے نئے پروگرام "دی گریٹ انڈین کپل شو” کے سیزن 3 کے ساتھ خبروں کی زینت بنے ہوئے ہیں۔ اس مقبولیت کی ایک بڑی وجہ ان کی فی قسط 5 کروڑ روپے فیس بھی ہے۔
نجی ٹی وی جیو نیوز کے مطابق، اس شو کا تیسرا سیزن 21 جون 2025 سے نشر ہو رہا ہے، جس میں نوجوت سنگھ سدھو کی واپسی بھی دیکھنے کو ملی ہے، جبکہ ارچنا پورن سنگھ بھی شو کا حصہ ہیں۔
بھارتی میڈیا رپورٹس کے مطابق، کپل شرما نے اپنے پہلے سیزن کے 13 اقساط کے لیے 65 کروڑ روپے وصول کیے تھے۔ سیزن 2 کے لیے بھی انہیں اتنا ہی معاوضہ دیا گیا، اور سیزن 3 میں بھی ان کی فیس میں کوئی تبدیلی نہیں کی گئی۔
اگر یہی رفتار برقرار رہی تو کپل شرما کی تین سیزنز کی مجموعی آمدن 195 کروڑ بھارتی روپے تک پہنچ سکتی ہے۔
یاد رہے کہ کپل شرما نے 2013 میں "کامیڈی نائٹس ود کپل” سے آغاز کیا تھا، بعد ازاں 2016 سے 2023 تک "دی کپل شرما شو” کے ذریعے عوامی توجہ حاصل کی۔ موجودہ سیزن کا نیا نام "دی گریٹ انڈین کپل شو” رکھا گیا ہے، جہاں بالی ووڈ ستارے اپنی فلموں کی پروموشن کے لیے آتے ہیں اور مزاحیہ گفتگو و دلچسپ کھیلوں میں حصہ لیتے ہیں۔
