پاک فوج کے سپہ سالار فیلڈ مارشل عاصم منیر نے چین کا سرکاری دورہ کیا جہاں انہوں نے چینی سیاسی اور عسکری قیادت سے اہم ملاقاتیں کیں۔ پاک فوج کے شعبہ تعلقات عامہ (آئی ایس پی آر) کے مطابق یہ ملاقاتیں دونوں ممالک کے اسٹریٹجک تعاون کو مزید مضبوط بنانے کے لیے کی گئیں۔
بیجنگ میں قیام کے دوران آرمی چیف نے چینی نائب صدر ہان ژینگ، وزیر خارجہ وانگ ای اور دیگر اعلیٰ حکام سے ملاقاتیں کیں۔ بات چیت کا محور خطے کی سیکیورٹی صورتحال، عالمی حالات میں تبدیلی، اور چین-پاکستان اقتصادی راہداری (سی پیک) کے تحت باہمی تعاون تھا۔
آئی ایس پی آر کے بیان کے مطابق، دونوں فریقین نے دو طرفہ تعلقات کی گہرائی پر اطمینان کا اظہار کیا اور خودمختاری، کثیرالجہتی تعاون اور خطے میں دیرپا استحکام کے عزم کو دہرایا۔
چینی قیادت نے پاک فوج کو جنوبی ایشیا میں امن کی ضامن اور ایک مضبوط ادارہ قرار دیا۔ عسکری سطح پر فیلڈ مارشل منیر نے چینی سنٹرل ملٹری کمیشن کے وائس چیئرمین جنرل ژانگ یوژیا، جنرل چن ہوئی اور لیفٹیننٹ جنرل کائی زائی جن سمیت پیپلز لبریشن آرمی (پی ایل اے) کے دیگر سینیئر افسران سے بھی ملاقات کی۔
ان ملاقاتوں میں دفاعی شعبے کی جدیدیت، انسداد دہشتگردی کے اقدامات، مشترکہ تربیت اور ادارہ جاتی تعاون پر تبادلہ خیال کیا گیا۔ دونوں ممالک نے ہائبرڈ اور سرحد پار خطرات سے نمٹنے کے لیے آپریشنل سطح پر ہم آہنگی بڑھانے پر زور دیا۔
چینی فوج نے دوطرفہ دفاعی شراکت داری پر مکمل اعتماد کا اظہار کرتے ہوئے پاکستان کے خطے میں استحکام کے کردار کو سراہا۔
فیلڈ مارشل منیر نے چینی قیادت کا شکریہ ادا کرتے ہوئے کہا کہ پاکستان تمام شعبوں میں دفاعی تعاون کو مزید فروغ دینے کے لیے پُرعزم ہے۔
پی ایل اے ہیڈکوارٹرز پہنچنے پر فیلڈ مارشل کو گارڈ آف آنر پیش کیا گیا، جو دونوں افواج کے درمیان دیرینہ تعلقات کی علامت ہے۔
آئی ایس پی آر کے مطابق یہ دورہ دونوں ممالک کے درمیان بڑھتی ہوئی سیاسی و عسکری قربت کا مظہر ہے اور یہ ثابت کرتا ہے کہ پاکستان اور چین خطے میں امن کے لیے مستقل اعلیٰ سطحی روابط برقرار رکھنا چاہتے ہیں۔
چین کی پاکستان کے انسداد دہشتگردی اقدامات کی حمایت
چینی وزیر خارجہ وانگ ای نے اپنے بیان میں کہا کہ پاکستانی فوج قومی مفادات کی محافظ اور پاک-چین دوستی کی پُرجوش حامی ہے۔ انہوں نے امید ظاہر کی کہ پاکستانی فوج دوطرفہ تعلقات میں اپنا کلیدی کردار جاری رکھے گی۔
چینی خبر رساں ادارے "ژنہوا” کے مطابق وانگ ای نے کہا کہ چین اور پاکستان نے ہمیشہ ایک دوسرے کے بنیادی مفادات پر مکمل حمایت کا مظاہرہ کیا ہے، اور چین پاکستانی حکومت و فوج کے ساتھ مل کر انسداد دہشتگردی کے اقدامات کو مزید مضبوط بنانے کا خواہاں ہے۔
انہوں نے کہا کہ چین کو توقع ہے کہ پاکستان چینی شہریوں، منصوبوں اور اداروں کی حفاظت کو یقینی بنانے کے لیے اپنی کوششیں جاری رکھے گا۔
فیلڈ مارشل منیر نے اس موقع پر کہا کہ چین کے ساتھ دوستانہ تعلقات پورے پاکستانی معاشرے کا اتفاق رائے ہیں اور پاکستان چین کی مسلسل حمایت کو دل سے سراہتا ہے۔ انہوں نے یقین دلایا کہ پاکستانی فوج چینی مفادات کے تحفظ کے لیے ہر ممکن اقدامات کرے گی اور دونوں ممالک کے درمیان انسداد دہشتگردی تعاون کو مزید فروغ دے گی۔
