7 ستمبر، 2025
کراچی:
محکمہ موسمیات نے اتوار کی شام کراچی سمیت سندھ کے مختلف حصوں میں بھاری سے انتہائی بھاری بارش کی پیش گوئی کرتے ہوئے خبردار کیا ہے کہ نشیبی علاقوں میں اربن فلڈنگ (شہری سیلاب) کا خدشہ ہے۔
محکمہ موسمیات کے مطابق کراچی کے شہری شام کے وقت تیز بارش کے لیے تیار رہیں، جبکہ شہر کے نواحی علاقوں میں بھی وقفے وقفے سے بارش کا امکان ہے۔ آئندہ 24 گھنٹوں کے دوران موسم جزوی طور پر ابر آلود رہے گا، زیادہ سے زیادہ درجہ حرارت 33 سے 35 ڈگری سینٹی گریڈ اور کم سے کم درجہ حرارت تقریباً 27.5 ڈگری سینٹی گریڈ رہنے کا امکان ہے۔
محکمہ موسمیات نے بتایا کہ بھارت کی ریاستوں مدھیہ پردیش اور راجستھان میں بننے والا کم دباؤ کا نظام مزید شدت اختیار کر گیا ہے، جس کے باعث سندھ کے مختلف شہروں میں بارش کے امکانات بڑھ گئے ہیں۔ اس صورتحال کے پیش نظر کراچی اور دیگر شہروں کے نشیبی علاقوں میں اربن فلڈنگ کا خطرہ ظاہر کیا گیا ہے۔
انتظامیہ نے شہریوں کو احتیاطی تدابیر اختیار کرنے کی ہدایت کی ہے اور ریسکیو اداروں کو بھی کسی بھی ہنگامی صورتحال کے لیے الرٹ رہنے کا کہا گیا ہے۔
