اسلام آباد — وزیر دفاع خواجہ آصف نے الزام عائد کیا ہے کہ پاکستان تحریک انصاف (پی ٹی آئی)، بھارت اور افغانستان کے درمیان ایک ’’ٹرائی اینگل‘‘ بن چکا ہے جس کے اثرات ملک میں بڑھتی ہوئی دہشت گردی کی صورت میں سامنے آ رہے ہیں۔
جیو نیوز سے گفتگو میں خواجہ آصف نے کہا کہ دہشت گردی کے واقعات کسی نہ کسی سطح پر جاری رہے ہیں اور اس وقت بنوں دہشت گردوں کا گڑھ بن چکا ہے۔
انہوں نے سوال اٹھایا کہ بانی پی ٹی آئی کا سوشل میڈیا اکاؤنٹ کون چلا رہا ہے؟ اور کہا کہ ’’اکاؤنٹس پر موجود مواد پڑھ کر یوں لگتا ہے جیسے بھارت سے کوئی انہیں چلا رہا ہو۔‘‘
خواجہ آصف نے کہا کہ پی ٹی آئی نے دہشت گردی کے خلاف ایک بھی واضح مذمتی بیان نہیں دیا، جبکہ افغانستان میں دہشت گردوں کے کیمپس موجود ہیں۔ ان کے بقول اگر افغان حکام یہ دعویٰ کرتے ہیں کہ دہشت گرد ان کی پناہ میں نہیں ہیں تو انہیں اپنی پوزیشن کھل کر واضح کرنا ہوگی۔
انہوں نے مزید کہا کہ پاکستان کو غیر مستحکم کرنے کی کوشش بھارت اور افغانستان دونوں کی جانب سے محسوس کی جا رہی ہے، مگر ’’اللہ کے فضل سے نہ بھارت اور نہ کوئی اور ملک پاکستان کو غیر مستحکم کر سکتا ہے۔‘‘
وزیر دفاع نے کہا کہ پاکستان کی مسلح افواج اور عوام کی قربانیوں نے دہشت گردوں کے عزائم ناکام بنا دیے ہیں اور بانی پی ٹی آئی کی ’’امیدوں کے دروازے‘‘ بھی بند ہوتے جا رہے ہیں۔
