کراچی: کمسن بچیوں اور بچوں کو اپنی ہوس کا نشانہ بنانے والے گرفتار ملزم شبیر احمد تنولی ولد محمد شفیق کے خلاف مزید دو مقدمات درج کرلیے گئے، جس کے بعد مقدمات کی مجموعی تعداد چھ ہوگئی ہے۔
ایس ایچ او ڈیفنس غلام نبی آفریدی کے مطابق گرفتار ملزم زیادہ تر کمسن بچیوں کو نشانہ بناتا تھا۔ نئے مقدمات متاثرہ بچیوں کے اہل خانہ کی مدعیت میں درج ہوئے، جنہوں نے سوشل میڈیا پر چلنے والی خبروں کے ذریعے ملزم کو شناخت کیا۔
پولیس حکام کا کہنا ہے کہ ملزم کے خلاف مزید شواہد اکٹھے کیے جا رہے ہیں تاکہ کیس کو مزید مضبوط بنایا جا سکے۔ اس مقصد کے لیے ایک خصوصی تحقیقاتی ٹیم بھی تشکیل دی گئی ہے جو مختلف پہلوؤں سے تفتیش کر رہی ہے۔
